(၂၃-၆-၂၀၂၆ ရက်၊ ဆိုးလ်)
မြန်မာသံရုံး၊ ဆိုးလ်မြို့မှ သံရုံးယာယီတာဝန်ခံ/သံအမတ်ကြီး ဦးမျိုးမြင့်မောင်သည် ၂၃-၆-၂၀၂၆ ရက်နေ့၊ နေ့လယ်ပိုင်းတွင် Hotel Naru Seoul MGallery Ambassador တွင် ကျင်းပသော အာဆီယံကော်မတီ (ဆိုးလ်) အဖွဲ့ဝင်သံအမတ်ကြီးများနှင့် Korea Immigration Service ၏ Commissioner Mr. Cha Yong-Bo တို့အကြား ဆွေးနွေးပွဲသို့ ပါဝင်တက်ရောက်ခဲ့ပါသည်။
အဆိုပါဆွေးနွေးပွဲတွင် သံရုံးယာယီတာဝန်ခံ/သံအမတ်ကြီးက ကိုရီးယားနိုင်ငံတွင် နေထိုင် ကြသော နိုင်ငံခြားသားများ (မြန်မာနိုင်ငံသားများအပါအဝင်)အတွက် လူဝင်မှုကြီးကြပ်ရေးနှင့် ပတ်သက်သောကိစ္စရပ်များကို စီမံခန့်ခွဲပေးလျက်ရှိသော လူဝင်မှုကြီးကြပ်ရေးဌာန၏ ဆောင်ရွက် ချက်များကို ကျေးဇူးတင်ရှိပါကြောင်း၊ ကိုရီးယားသမ္မတနိုင်ငံတွင်နေထိုင်သည့် မြန်မာနိုင်ငံသား များအတွက် အကူအညီပေးအပ်နေမှုများကိုလည်း ဆက်လက်လုပ်ဆောင်ပေးသွားရန်နှင့် မြန်မာ သံရုံးမှလည်း ပူးပေါင်းဆောင်ရွက်လျက်ရှိပါကြောင်း၊ ဆက်လက်၍လည်း မြန်မာသံရုံးသည် ကိုရီးယားလူဝင်မှုကြီးကြပ်ရေးဌာနနှင့်ပူးပေါင်း၍ ပြည်သူကို အသိပညာပေးခြင်း၊ အချက်အလက် မျှဝေခြင်းနှင့် စည်းမျဉ်း၊စည်းကမ်းဥပဒေများနှင့်အညီ ကိုရီးယားသမ္မတနိုင်ငံရှိ မြန်မာနိုင်ငံသား များသိရှိဆောင်ရွက်ရေးအတွက် လိုအပ်သလို ပူးပေါင်းဆောင်ရွက်သွားမည် ဖြစ်ကြောင်း ဆွေးနွေးပြောကြားခဲ့ပါသည်။
